मुहार फेर्दै पञ्चकन्या पोखरी
पौराणिक रहस्य बोकेको ‘पञ्चकन्या पोखरी’, पर्यटकीय सम्भावनाले भरिएको
– होमस्टे खबर डेस्क,
सदरमुकाम सिन्धुलीमाडीबाट करिब १५ किलोमिटर पूर्वमा, मरिण नदीको किनारमा अवस्थित पञ्चकन्या पोखरी ऐतिहासिक, पुरातात्विक र धार्मिक महत्त्व बोकेको स्थल हो। घना जंगलको काखमा लुकेको यो पोखरी हजारौं वर्ष पुरानो पवित्र जलकुण्डका रूपमा चिनिन्छ।स्थानीय किम्बदन्तीअनुसार, यस पोखरी पाँच देवकन्याहरूको वासस्थान हो, जसका कारण यसको नाम ‘पञ्चकन्या पोखरी’ रहन गएको हो। पोखरीको डिलमा अवस्थित पञ्चकन्या देवीको मन्दिरमा भक्तजनहरू शुद्ध भई पूजा-अर्चना गर्दछन् र आस्था अनुसार भाकल गर्दा मागेको वर पाइने जनविश्वास रहिआएको छ।प्राकृतिक रूपमा समेत यो पोखरी अत्यन्त आकर्षक मानिन्छ। हजारौं वर्षदेखि उस्तै जल सतह रहेको, वरिपरि घना जंगल, जंगली जनावर र विविध प्रजातिका चराचुरुङ्गीहरूले यस क्षेत्रको पर्यटन महत्त्वलाई झनै आकर्षक बनाएको छ।
मरिण गाउँपालिका अध्यक्ष विमर्श मुक्तानको भनाइ:
“पञ्चकन्या पोखरी केवल धार्मिक आस्थाको केन्द्र मात्र होइन, हाम्रो गाउँपालिकाको भविष्यको सम्भावनाशील पर्यटकीय गन्तव्य पनि हो। हामी यसको संरक्षण, प्रचार–प्रसार र पूर्वाधार विकासमा प्राथमिकता दिइरहेका छौं। स्थानीय संस्कृति, प्रकृति र अध्यात्मको संगम भएको यो स्थल सम्पूर्ण देशभरका पर्यटकलाई आकर्षित गर्ने गन्तव्य बन्नेमा हामी दृढ छौं।”
— विमर्श मुक्तान, अध्यक्ष, मरिण गाउँपालिका
अध्यक्ष मुक्तानका अनुसार गाउँपालिकाले निकट भविष्यमा पञ्चकन्या पोखरीसम्म पुग्ने बाटो स्तरोन्नति, साइनबोर्ड स्थापन, पर्यटकका लागि पूर्वाधार निर्माण लगायतका योजना अघि बढाइरहेको छ।यदि संरक्षण र प्रवर्द्धनमा जोड दिइयो भने, पञ्चकन्या पोखरी सिन्धुली मात्र होइन, राष्ट्रिय स्तरकै प्राकृतिक–धार्मिक पर्यटकीय गन्तव्य बन्न सक्छ भन्नेमा स्थानीय समुदाय पनि आशावादी देखिन्छ।
